Хичээлийн шинэ жилийн босгон дээр Монос Хүнс ХК ХӨСҮТ-ийн Агаар дуслын халдварын тасагт “Тусгай хэрэгцээт хүүхдэд зориулсан эмчилгээний өрөө”-г тохижуулан хүлээлгэн өглөө.

Энэхүү өрөө нь хүүхдүүд аав, ээж, асран хамгаалагчийнхаа хамт цагийг өнгөрүүлэх боломжтойгоор зохион байгуулагдсан бөгөөд зөвхөн эмчилгээний бус, сэтгэл санааг дэмжихэд чиглэжээ.

ХӨСҮТ-ийн Ерөнхий захирал С. Энхболд: “Тусгай хэрэгцээт хүүхдүүдийн хувьд халдварт өвчин, ялангуяа уушгины замын халдвар хурдан хүндрэх эрсдэлтэй тул аюулгүй, тав тухтай, сэтгэл зүйн хэрэгцээнд нийцсэн орчныг бүрдүүлэх хэрэгцээ шаардлага өндөр байсан. Түүнчлэн хичээл сургууль эхэлж, томуу, томуу төст өвчний дэгдэлт нэмэгдэх эрсдэл өндөр байгаа энэ үед энэхүү өрөөний нээлт болж буй нь цаг үеийн хувьд онцгой ач холбогдолтой үйл явдал боллоо.

Олон улсын стандартад нийцсэн ариун цэврийн өрөө, банн, халдваргүйжүүлэх кварцын гэрэл болон бусад тохижилт нь бие болон сэтгэл санаагаа тайвшруулснаар эмчилгээнд түлхэц болох боломжтой боллоо. Мөн энэхүү санаачилга нь хүүхдийн инээд, эцэг эхийн талархал, эмч сувилагчдын ажлын урамд үнэтэй хувь нэмэр оруулж байгаа тул Монос Хүнс ХК-ийн хамт олондоо талархал илэрхийлье гэсэн юм.

Энэ удаагийн тохижилтын ажил нь Монос Хүнс ХК-ийн хүүхдэд чиглэсэн нийгмийн хариуцлагын үйл ажиллагааны нэг хэсэг бөгөөд үүнээс өмнө тус компани ЭХЭМҮТ-ийн Ерөнхий мэс заслын хүлээлгийн болон үзлэгийн өрөө, мөн ГССҮТ-ийн Түлэгдлийн эмнэлгийн нөхөн сэргээх хүүхдийн тасгийн өрөөг засварлан тохижуулж, хүүхдүүдэд аюулгүй, ая тухтай орчныг бүрдүүлж байжээ.

Монос Хүнс ХК-ийн Үйл ажиллагаа хариуцсан захирал Э.Амарболд:

“Манай компани нийгмийн хариуцлагын хүрээнд хүүхдэд ээлтэй, аюулгүй, ая тухтай орчныг бий болгоход тогтмол анхаарч ажилладаг. Энэ удаад улаанбурхан болон бусад халдварт өвчний дэгдэлтийн үед хүүхдүүдэд зориулагдсан өрөөг иж бүрэн засварлан хүлээлгэн өгч байгаадаа баяртай байна. Цаашид ч бид олон нийтийн эрүүл мэнд, нийгмийн хөгжилд бодит хувь нэмэр оруулсаар байх болно” гэв.